مش هنفرح بيك بقى؟

مش هنفرح بيك بقى؟

يرتبط حال ومصير كل الشعب المصري بالاقتراحات...

سواء كانت الاقتراحات دي بناءة او هدامة.. مش مهم.

الشعب المصري معروف بذوقه العالي

وانه افراده لهم احساس مرهف

صعب انهم يكسفو أي حد أبدا

حتى فيما يتعلق بحياتهم وقراراتهم الشخصية

حتى في حياتهم الزوجية

الى مراحل تصل الى داخل غرفة النوم

والى ما هو ابعد من ذلك

على سبيل المثال,

لو تأملت في حال البلد في الوقت الحالي اقتصاديا وماديا

هتلاقي ان عدد السكان تضاعف من 20 مليون في الخمسينات

الى 5 اضعاف او 100 مليون بعد 70 سنة

كل ده في ظل عدم استقرار مادي و ضغوط اقتصادية متزايدة

وغلا في اسعار الاحتياجات الاساسية من سكن وغذاء

ومشاكل تانية يشهد عليها الزمن والاحياء قبل الاموات

يعني كل واحد فينا غالبا ادرك احد جدوده او حد من زمن جدوده

وكلهم حكوله ايام لما كان كيلو اللحمة بثلاثة تعريفة

وايام لما مصر كانت بتسلف بريطانيا

وانا نفسي حضرت لما كنت بنزل وانا عيل بجنيه واشبرق نفسي

كولا وشيبسي ولبان وصور لصق والغاز وعجل وبينج بونج والذي منه

المهم نرجع تاني لموضوع الاقتراحات

عشان هو ده زبدة الحلاوة الطحينية

وتفسير ازاي العدد وصل ل 100 مليون

"الشباب عماد الأمة"

الشاب يبقى لسه متخرج وبيدور على شغل

او في مقتبل حياته اللي هي اصلا سببها

ان الاب منعدم القدرة على التحكم في الشهوة

اختلى بالأم في لحظة اندفاع وخلص الموضوع في ثانية

عشان يلحق بعدها يتعشى ويسمع أو يشوف المسلسل

يقوم الام والقرايب..

والزمايل في الشغل اذا كان محظوظ واشتغل

والمحيطين بيه في المجتمع...

كل دول يبتدو يسلو وقتهم

ويشوروعليه انه يشاركهم النجاح..

ويقترحو..

يقترحو عليه انه لازم يتجوز عشان يفرحو بيه..

اصل هم الحقيقة نفسهم يفرحو والدنيا صعبة

فأسهل مصدر للفرحة دي انه الشاب ده يلاقيله واحدة

ويقوم عامل ليلة يكلفها كل اللي حيلته او حيلة اهله

عشان يعزم الناس دول اللي نفسهم يفرحو بيه

في من الناس دول شوية بنات عايزين يعملو تسويق لمنتجاتهم

في الليلة دي ويلاقو حد يتجوزهم بالمرة..

وفي شوية ولاد متقمصين شخصيات شافوها

في افلام امريكاني انتاج رخيص

ونفسهم حد يصدق انهم صيع ورجالة فشخ..

بس الصياعة ادب زي ما بيقولو في الافلام المحلية

لذلك بيكتفو انهم يفشخو عربياتهم ويفشخو جيوب اهاليهم

ويدفعو بنزين ويفشخو الشوارع زحمة وزيطة

ويضروبو صواريخ من اللي بتفرقع في السما

زي في افلام المافيا لما حد من الزعماء بينجح في سرقة بنك جديد

وتعلن الانفجارات المدوية المصحوبة باضواء الصواريخ

عن بلوغ الشعب قمة سعادته..

لأن الشاب خد بنصيحتهم ونفذ اقتراحهم

ودخل نفسه في وضع ومسؤولية ما يعرفش عنهم اي حاجة

لكن طبعا دي سنة الحياة وخير البر عاجله

وعشان يكمل برده نص دينه..

ودين امه.. ودين أهله.. الطيبين

لسه الشاب مالحقش يفوق من سكرة الحفلة

والمسكين حلاوة العسل عميا عينيه

وملخلخة ركبه ورجليه

تقوم مجموعة تانية من المحيطين بيه تعمل اقتراح جديد

قد يكون بالاشتراك مع جزء من اللي كانو محيطين بيه

قبل ما يقدم على خطوة النكاح.. اقصد عقد النكاح

والاقتراح ده جديد في التوقيت فقط

انما فحواه تتطابق مع اللي قبله

وملخصه... "مش هتفرحنا بقى"

يقوم الشاب اللي هو أصلا مانجحش في اي حاجة

قبل كده في حياته يكتشف ان سعادة مجموعة

كبيرة من البشر متوقفة عليه

يقوم يجيله احساس عارم بالفخر المصحوب بالتضحية

حاجة كده ميكس بين المختار المخلص

بس على حمدي الوزير في نفس ذات الوقت

طبعا معروف ومتعارف عليه ان مراة الشاب ده

هتشوف ايام وسخة خلال الفترة اللي جاية..

لأنه مش هيعتقها ولا يسيبها في حالها

وهيبقى فاكر ان اللقطة الرومانسية بتاعة الحضن اللي من ورا

(في المطبخ او في اي موضع تطؤه قدم مراته)

هيشوف المشهد ده دي حقيقة

ومن حق وواجب  كل زوج انه يتنفذ

(امال اتجوزت ليه بقى؟!)

طبعا الكلام ده لو مراته اصلا مش متورطة في منافسة شرسة

بغرض التكاثروهدفها الخلفة لأهداف متعلقة بأرض او ورث

او حتى غيرة من واحدة جارتها او واحدة شافتها صدفة ع المحطة

او للتنافس مع مراة اخوها على عربية قصب او تروسيكل روبابيكيا

عشان ألخص لكم بس من غير هري وتكرار

انا هقول لكم ال 100 مليون جم ازاي

في شكل سلسلة حسابية هندسية

غير منطقية مصفوفة لولبية

-        شاب عازب

-        مش هنفرح بيك بقى؟

-        شاب متزوج

-        مش هنفرح بيك بقى؟

-        شاب متزوج ويعول

-        مش هتفرحنا بقى وتخاويه؟ (او تخاويها عشان الفيمينيست بس)

-        شاب متزوج ومعاه 2

-        مش هتفرحنا بقى؟ ده التالتة ثابتة. واقفل على كده.

-        اقفل على ايه بالضبط؟

-        لا مايروحش مخك لبعيد.. يعني 3 كفاية بالصلاة ع النبي يا حمام

-        شاب متزوج ومعاه 3

-        مش عنفرح بيك بقى؟ عايزين ربع مشكل

-        شاب متزوج ومعاه 4

-        مش عتفرحنا بقى؟ عشان يبقى 5 وخميسة

-        شاب متزوج ومعاه 5

-        مش عتفرحنا بقى؟ قال على رأي المثل.. اشخري يا قتا الخيار بستة

-        شاب متزوج ومعاه 6

-        مش عتفرحنا بقى؟ ده انت تكه ويبقى معاك اسبوع بحاله

-        شاب متزوج ومعاه 7

وهكذا عبر الشهور والسنين.. شكلت اقتراحات الشعب المصري

الماضي والحاضر والمستقبل.. لحد لما بقينا 100 مليون.

بعد كل الهري ده.. انت قاعد بتقرى و بتبحلق في ايه؟؟

يللا على الأودة..وللا مش عايزنا نفرح بيك بقى؟

(ال-زائر)