عن الجام و قعدات الارتجال

عن الجام و قعدات الارتجال

سلامو عليكم

مبسوط ان في كثير مهتمين بالارتجال

وانه زي ما في عشاق للتأليف والتلحين ولعزف الأغاني المشهورة

في كمان عشاق للتقسيم والارتجال

ممكن تسمعو التراك ده لو هيسليكم في قراية البوست ده لأخره
دي مقطوعة بعنوان من حين لأخر
من تاليفي بالاشتراك مع صديقي محمد سامي في 2012

انا عمري ما كملت دراسة موسيقى بشكل اكاديمي,
لكن بحاول اجمع معلومات مفيدة من هنا ومن هنا

عن طريق متابعة ومشاهدة عمالقة الارتجال سواء جوا او بره مصر

سواء عربي او انجليزي او حتى عن طريق ترجمة لغات تانية..

اسباني/تركي/ايطالي/برتغالي/روسي/فارسي

حبيت اشارك معاكم النقط اللي في البوست ده من تجربتي

تحت عنوان "رحلة الولهان في اداب الجام" اي بتنجان!! J

في كذا صديق سألوني ايه اكثر حاجات بتبسطك في الجام

وانا هنا بسالكم نفس السؤال وبليز اكتبولي رايكم في التعليقات

دي كام نقطة في شكل نصايح بخصوص الموضوع ده

1-      قعدة الجام Jam Session  زي محادثة او حوار بين طرفين او اكثر. لازم يبقى فيها فرصة متساوية لكل طرف انه يتكلم بحرية لكن في نفس الوقت لازم يكون فيها استماع مماثل بكل احترام واهتمام. طبعا مش كل القعدات لازم تكون جادة وصارمة. المقصود بس ان يبقى في وعي عن حتة احترام جميع الاطراف اللي في الجام وان كل الموجودين يكون ليهم فرصة تعبير فني متساوية

2-      لا للكسل لا للفوضى مش مهم أي جير او المعدات اللي هتستخدمها في الجام, لكن على الأقل الألة الاساسية اللي هتستخدمها في الارتجال لازم تكون في حالة كويسة. في الجيتار مثلا لازم يكون متون او على الأقل مضبوط انه يتون بسهولة وبسرعة. لو اوتارك مصدية او كبلاتك ملمسة مش من المنطقي ان القعدة تقف في انتظار سعادتك لما تضبط دنيتك! أي حاجة اساسية في عزفك يفضل تكون جاهزة..

كابلات – بيكات – تراكات – بطاريات - افشخانات..

الكلام ده مش مكلف ومش هياخد منك اكثر من 10 دقائق تشييك او استعداد قبل ما توصل مكان الجام

3-      لا للانفراد  لو هتلعب لفة كوردات مثلا لازم تعمل حسابك ان العازف اللي معاك يلعب بنفس القدر بالضبط. مثلا لو بتلعب بلوز وانت بتلعب لفتين 12 بار عند اخر لفتك لازم توقف وتدي فرصة لزميلك في الجام انه يلعب لفتين زيك بالضبط. من غير مقاطعة ومن غير تدخل بشكل فيه تشتيت او تغطية على ارتجال زميلك. لو قررت انك تسرح دقيقة كاملة في دورك لازم بعدها تحترم دور زميلك وتديله دقيقة كاملة تمام زي مانت لعبت. فاكر الواد اللي معاك في المدرسة اللي لما بيمسك الكورة مش بيباصي لحد؟ J

النقطة دي مهمة جدا وعلى اساها الجام ممكن يتحول من اي كلام وتضييع وقت لحاجة محترمة ومشوقة

لكل العازفين وكل المستمعين

4-      لا للمقاطعة لو في سلم معين انت مش متمكن منه او في فكرة لاين معينة جت في دماغك في وسط الجام مش من الصح انك تبتدي تتمرن عليها وانت مش في دورك او وقت ما زميلك هوا اللي بيرتجل. لو حبيت ممكن تمرن عينيك على اماكن السلالم وده هيساعدك كثير انك تطور من نفسك على الجيتار أو اي ألة بتعزف عليها. لو بتلعب مع حد مستواه اعلى منك ممكن بكل بساطة تسأله عن السلم او الكوردات اللي انت مش عارفها. كمان لما تلعب مع حد مبتدئ من واجبك انك توجهه او تساعده قبل الجام.

5-     نعم للتناغم والتوافق  حاول توصل لموجة مستقرة ومقاربة لموجة الجام العامة او مستوى الطاقة (الفايب) الغالب مع زميلك او العازفين اللي موجودين معاك في الجام. بمعنى لو العزف هادي ورايق وعلى مهله زي بلوز بطيئة مثلا مش من المنطقي انك تخش في دورك ترزع وتتشقلب وتعزف كانك فجأة بتلعب مع ميتاليكا على المسرح! المستوى الديناميكي وشدة العزف من الحاجات اللي هتفرق كثير جدا لما تركز عليها وتستوعبها. ومع الوقت هتوصل انك مع اي عازفين ممكن تتنقلو بين المستويات المختلفة دي بشكل تلقائي وغير فجائي وغير ملحوظ وحتى من غير كلام بمجرد النظر..

6-      لا للاصطناع حاول تبعد عن الاستعراض من اجل الاستعراض والافتعال. تخيل مثلا لو ماتش كورة ابتدى ومن اول لمسة قام محمد صلاح ماسك الكورة وطالع يستعرض ويرقص الفرقة كلها وعايز يجيب جون! هل ده سلوك معقول؟ نفس الفكرة في العزف. الحرفنة والصياعة ما بتجيش بالاصطناع والافتعال. كقاعدة اساسية التلقائي والبسيط دايما بيكسب. لكن لو الجام تتطور وسخن وجاتلك فرصة تبدع يبقى ده توقيت سليم وانك تستعرض في توقيت زي ده هوا الصح وهو احسن حاجة ممكن تتعمل. تماما زي لما صلاح يستلم كورة من هجمة مرتدة ويستغلها بمهاراته في احراز هدف فشيخ في الشبكة.

7-    نعم للابداع لا للنقش  كلنا كموسيقيين وعازفين بنتأثر بالموسيقى اللي بنسمعها. وكلنا ممكن نلقط ونتأثر بافكار من بعض. اللي بيفرق فنان حقيقي عن غيره هو مستوى ابداعه وعلاماته المميزة ولزماته. حاول تبعد عن النسخ سواء من زميل ليك او من نجم مشهور. وحاول انك تكون واعي لما تنسخ من حد, مش من الظريف انك تنسخ اسلوب حد وتنسبه لنفسك او تعمل عبيط! حاول تبني مكتبة لمفرداتك وافكارك الموسيقية مع الوقت. وده بييجي من ممارستك للارتجال والعزف بشكل جاد ومنتظم.

طبعا كل ما تستمر وتواظب على العزف قدرتك على ترجمة افكارك لجمل موسيقية بتزيد حتى انك توصل لعزف اي فكرة تخطر على بالك في لحظتها.

المقصود من البوست ده مشاركة بعض النقط المهمة لكن طبعا البوست ده مش مقدس ومش معناه انه كل اللي فيه صح مطلق او ينطبق على كل المواقف والمناسبات. الهدف الاساسي هو نشر الفكرة عند المبتدئين والمهتمين سواء عازفين او مغنيين او غيره. وزي ما قلت انا مش اكاديمي ولا ادعي خبرة انا بعيد عنها.

لو عندكم اي افكار اكتبولي في الكومينتات.
ولو حد مهتم تعرفوه بليز شيرو معاه البوست

وشكرا لكل الأسئلة والاقتراحات